Passer le texte de l’article
И тамъ осажено короля его милость , и без мало до того не пришло ( было ) , же и узято бы было , бо уже нѣотколя помочи сподѣватися было ; можная рѣчь , любо не приступомъ , але и голодомъ оныхъ звоевати . Однакъ же и гетманъ Хмелницкій того не зичилъ , жеби мѣлъ ся достати монарха християнскій в руки и в неволю бѣсурманскую . И такъ из собою трактовати почали през дней два и учинили згоду , же не мѣли по самую Случъ жолнѣре на Украину бывати , толко опрочъ урядове старостове по городахъ , албо сами панове , жеби уже болшъ задору и причини до войни не давано . А ордѣ плата полономъ городовъ дванадцяти которіе могут виняти . И по тихъ трактатахъ , узявши заставу пановъ значнихъ у войско , гетманъ Хмелницкій бытностю своею былъ у короля его милости в Зборовѣ , где оного шановано , ударовано и другого дня отпущено до войска . И такъ король его милость повернулъ назадъ до Лвова ; а Хмелницкій , пришовши под Збараже , приказалъ з шанцовъ войску уступити и южъ межи собою з войскомъ короннимъ болше задору не чинити ; бо и от короля его милости посланцове до князя Вишневецкого пришли , посполу при гетману Хмелницкомъ , и до всего того войска , зостаючого в облеженню в Збаражу , ознаймуючи о той згодѣ . И Хмелницкій з ханомъ кримскимъ , росправивши орду , то есть мурзи придавши и козаковъ , — и такъ многие городи козаки позводили , и людей татаре в неволю побрали , и козаки маетности побрали и мѣста значніе спустѣли . И днемъ перед Успеніемъ Богородици уступило войско козацкое и орди от Збаража , тягнучи просто на Украину . Того ж року войско литовское под Заганямъ и Хвойниками розбили полкъ киевскій з Кричевскимъ . Того жъ року саранча великая была и збоже зопсовала , же дорожнета великая была и на хлѣбъ , и на соль , и на сѣно . И такъ по оной згодѣ понаиздили урядове на Украину были , и самъ воевода киевскій Адамъ Кисѣль з жоною в Киевѣ зоставалъ , бо , якъ благочестивий панъ , в згодѣ з гетманомъ Хмелницкимъ былъ . По той згодѣ выкупили обохъ гетмановъ короннихъ , Потоцкого и Калиновского , и при нихъ гетманства зоставили . Року 1650 . Не хотячи войско порожніовати , а звлаща з такимъ поганиномъ и ворогомъ вѣри християнской збратавшися , — Волоская земля християнство любо зостаетъ в подданствѣ турчиновѣ , але однакъ , же южъ почали обфито жить при одиномъ господару спокойно Василю Лупилѣ , и тому позавидѣвши , же бы оныхъ уменшати , же християнство а звлаща Русь гору узяла , такъ розумѣю , же за позволеніемъ турчина , — ханъ кримскій з гетманомъ Хмелницкимъ несподѣвано зо всѣми потугами козацкими и татарскими , напавши на Волоскую землю , в нѣвецъ усю обернули , звоевали до саміе гори , людей побрали в полонъ и набитки ихъ ; тилко замки моцніе одержалися , и самъ господаръ уступилъ былъ з Ясъ мѣста столечного , але знову ся навернулъ . А Хмелницкій стоялъ з ханомъ у Прута . А тую землю чатами звоевали . А напотомъ господаръ поедналъ орду и гетмана Хмелницкого , жеби ся вернули з его землі , и учинилъ сватство з Хмелницкимъ — дочку свою за сина Хмелницкого приобицалъ дати , що напотомъ и учинилъ . А войско коронное з гетманами стояло под Каменцемъ Подольскимъ , не даючи жадной причини козакомъ до войни . И такъ того року жадной войни з короннимъ войскомъ не имѣлъ , але повернувши о Покровѣ з Волохъ , з упокоемъ сидѣли в домахъ .
Précédent Page 8 sur 79 Page 8 sur 79 Suivant Continuez à lire avec les traductions Créez un compte gratuit : 7 jours de Pro, puis 20 traductions de mots par jour ou une formule payante.
